28/09/2007

 


كل الرسائل تنشر كما هى وبدون تصحيح للأخطاء الإملائية أوالنحوية

 
من حكايات البسباسي 2007
 
بقلم: أمال منير (بنت طرابلس) - حركة العصيان المدني بليبيا
 
(عنوان الحكاية: شفافية زهرة والبسباسي)

 

 
  بسباسي ..بسباسي تيوينك يا دعوة وينك ؟..... بسباسي .. بسباسي ! يا ولد الجماهيرية الأولى.. وينك, أطلع وأبان عليك الأمان, أمان أمتاعي أني, مش أمان أجماعة ليبيا الغد... ليبيا الدستور والعقد الاجتماعيييييي !!!
 
  تي خيرك يا زهرة غير اتصرخي وقالبة الدنيا أعياط .. تي وطي حسك يا زهرة .. تي نقصي صوتك يا دعوة ... ولا تعلمتي الصراخ منذ بلوج يومك وميلادك لحرف ... أيه النساوين الليبيات منذ الولادة وهي واخذه على الصراخ والعياط.
 
  ليبيا الثورة ... ليبيا الجماهيرية ... ليبيا الثروة ... ليبيا الثروة والسلطة والسلاح يا بسباسي ... وليبيـــــــا الغد يا يا بوسي ... أهيه ليبيا الثروة غصبن عنك وعن مصرف ليبيا المركزي ... بنك الفلوس الليبية يا بسباسي اللي تشري في كل شي. كل شي حتى الإذاعات والفضائيات تشريها, بيش تنطمر وتسكت علي ساير في البلاد ...بسباسي ... تهي ليبيا مش دولة عربية ولا شني ؟ مش الناس سواسية كأسنان الموشطة, أمالا ويين العرب الليبيين .. بيش أيتكلموا على حالنا لغبر اللي ساير في البلاد .ولا اللي ساير فينا أشوية .. يا أمة العرب ورسول الله.
 
  أقريب يا زهرة ... اقريب يا زهرة ما داروا الليبيين إذاعة وفضائية حرة ... يا حسرة مصارش منها شي ... لأن أسيادنا الأمريكان ما يبوناش نتكلم ... وبوش الزعيم الجديد للعرب ما يبيش إلا زريعة وحدة يعرفوها هما أكويس ... زريعة القائد وبس يا زهرة ... هي اللي تتكلم وتقوللنا ليبيا الغد .. ليبيا العمارات والمطارات والمليارات .. والزريعة هذي هي اللي تتكلم وتصول وتجول في البلاد ... يا حسرة ... أقريب يا زهرة ما فتحوا الليبيين قضائية حرة .... أتقوللنا الكلام الحقاني.
 
  قضائية ليبية ... وحرة ... لا حرام على الفضاء يا بسباسي ... الفضاء بعدين مزاجه يتعكر ,الفضاء والهوا تكبر غيه حفرة الأزون بعدين يا بسباسي من جرت الإذاعة الليبية الحرة ... ويقعد الفضاء متنكد كل يوم .. الفضاء اللي فيه كل شي !! ايسيرله أتخلبيطه أكبيرة بالتلفزيون الليبي الجديد ... لكن شكله أمام العرب والمسلمين الجديد ..لايرغب فيها يا بسباسي .. ولازم أديرو (القاراكوز) ... أحسن يا ليبيين مش أذاعة فضائية حقانية.
 
  والله فكرتيني بالقارقوز يا زهرة ... تراث ليبي حقاني ... نرسموا المعارضين الليبيين االي جوا واللي بره ونشغلوهم بالقارقوز ... ويقعد القاراقوز الفضائي الليبي الحر ... هنا الأختراع القراقوزي المهم ... لاكن حتى هادا يبي تصريح حتى هوا من الأفندي (بوش) ..أمتاع دولة الحرية وحقوق الناس ... هنا القارقوز الليبي الحر ... صوت الشعب الليبي الحقاني !!
 
  يا شينك حوسة يا بسباسي ... تباهي هما الليبيين مرخيين هلبه راهو ... أو ماتقول إلا (سعي) شايلينهم للجزار ويزغرتوا ... تهما خيرهم الليبيين هكي العفو يا بسباسي ... قالك دستور من أخراج زريعة القائد .. قالك نماء .. قالك بناء ... تهما شنو يبو منا بالله .. ديرولهم حل يا بسباسي ... ولا انتم مش اتريس كيف التريس أمتاع أزمان ياودي ...
 
  أتريس .. أتريس هضاك الزمان ماتوا في الجمعيات والدعاك قدامها يا زهرة ... والحسرة والفقر .. التريس اللي لبسوهم الكاكي ودزوهم أشيابين لأوغنده وراحو ... التريس اللي رموهم بحرب أتشاد ... التريس الحقاني ... باي باي يا زهرة ... ايشوفوا في القهرة وساكتين ... لعند قعدوا أتريسات الكارطة أحسن منهم يازهرة .... طايحين عال الكارطة يا زهرة ... الحية عندك ولا عندي ... واللص حايس فيها والخانب ما يشبع بوكل يا زهرة ... والجوكر يقعد يطلع مرة مرة مش زي أزمان ... أهوا نكد وشكله يبي ايريح.
 
  الاخت الليبية ,,, الأخت الليبية .. حتى هي ما أتقول إلا الموجيرا أمتاع الكارطة, يسحبوا فيها أيمين وإيسار ما أتقول إلا ورقة زايده ... وحتى هيا ساكته راهو يا بسباسي ... وولدها قتلوها قدامها ...وهي ساكته ... شالوه البوليس الليبي العتيد ... وهي ساكته ... دسوه بالحبوس لعند أقعد شايب ... وهي ساكته. أنساوين أزمان كانت على الأقل تصرخ يا بسباسي بوجه الطلياني وترمي في الرشاد , لكن الموجيرة اللي توا ... هاوينة أمتاع (أسكت يا ولد راك تتكلم ... أسكت أسكت) موجيره تاكل واتمرقد وخلاص .. لاحس لاخبر .. أوينك يا عرس ولا أطهار وتمشيله ... لكن أولدها أيموت قدامها ..لا للكلام ..لا للصوت .. لا لا لا .هما النساوين اللي بره مش كيفنا ولا شني با موجيرة يا ليبية ؟
 
  الصوت ممنوع ... ببلاد الممنوع, تأ كثر علامة يازهرة عندنا هي الممنوع وخاصة الكلام في الممنوع ... شفافية ... حرية صحافة .. المواطن السيد ... ووصل القائد لمطار موسكو, ورحل القائد ولكنه رجع على الفور, لأنه لايستطيع أفراقنا يا زهرة ... القائد يعشقنا بوكل يا زهرة ... وايموت فينا راهو ... أيحبنا حب أبعد هكي لا ... القائد يرجع بالحال .. ويلغي زيارته.
 
  هوا بالحق, القائد خيره مش كيف لخرين, لا سفر لا سياحة, على الأقل مرات أيشوف الناس لخره كيف دايرين أمعا ناسهم, ولا لا يابسباسي ... القائد ميه ميه ايحبنا هلبة, ومش قادر ايفارق أوجوهنا. ولا كان سافر هوينك يا أفريقيا, ,اشكاير الدورلار في الشوارع ... والليبيين صدقة جارية يا شيخ البسباسي.
 
النفط النفط ... البرميل النفط يا زهرة أوصل قالوا لخط الثمانين يا فالحة ! والليبيين ايبلحقوا في أعيونهم وأخلاص ... والراتب نزل لا مزال ,, واخر حاجة لزوهم من التعليم, ومزالوا ايزغرتوا وهما شايلينهم للجزار يا زهرة !!
 
  فوق التمانين ولاحتى الميه ...شني يعني ... مش ليك يا بسباسي يا ولد الجماهيرية ... تهادي مش براميلك يا بسباسي, هادي أمتاع صناع الحياة, وصناع التاريخ الليبي يا بسباسي ... مش ليك النفط والبنزينة أمتاع اترابك ووطنك يا فالح.
 
أيه صناع الحياة والطريق المستقيم , لليبيين, صناع الفجر والنهار والشمس يا زهرة ... تعالي شوفي شمس أبلادنا يا زهرة ... توا كيف شمسنا كيف شمس لخرين يا زهرة ؟ هنالك اختلاف اكبير يا زهرة.
 
  لا يا ودي شمس أبلادي شكلها مش كيف .... لونها راهو هلبة أصفر يا بسباسي, غير نوض بدري هلبة وشوفها, غير بلحق فيها بس وتوا أتشوف .. مرات حتى هيا مكتوب عليها طابوا القائد و صورته ...يا بسباسي. غير تأدلنا يا بسباسي من شمس أبلادي اللي مرسومة على صحيقة الفجر الجديد, مرات يقعد فيها طابوا ولا عقد حتى هيا ومبيوعة للقائد حتى هيا ؟
 
  العشق الأبدي ... الدوام الأبدي ... العمر المديد ... والتوريث للحب والعشق ... أهماه ايجهزوا في البديل الجديد .. البديل الجوكر يا زهرة, لا فراق بعد اليوم , واللي فارق يا زهرة عيب ... أحرام, وبعدين من اللي قالك يا زهرة أن القائد زعيم ولا رئيس, تهادا الثوري الوحيد اللي ماسك فينا بسنونة.
 
  بسنونة, هوا القائد غنده أسنون أني عمري ما شقتهم يا بسباسي .. بكلي شفتهم أنت أيام المقاومة الشعبية يا بسباسي ... اللي لبسوك فيها البدلة الخضرا العنفاري.
 
  نوضي يا زهرة جيبلنا الحليب بيش نسحر الفجر قرب راهو.
 
  أيه الفجر قرب يا بسباسي .. وشكله ديكنا أكبر عال الأذان ... ومعش أعليه أعبا.

أنتهى الموضوع
 
امال منير (بنت طرابلس)
amalmnr@yahoo.com
حركة العصيان المدني بليبيا

جميع المقالات والأراء التي تنشر في هذا الموقع تعبر عن رأي أصحابها فقط، ولا تعبر بالضرورة عن رأي إدارة الموقع >>>> ليبيا المستقبل منبر حر لكل من يطمح ويسعى لغد أفضل لليبيا الحبيبة

libyaalmostakbal@yahoo.com