03/09/2007

 


كل الرسائل تنشر كما هى وبدون تصحيح للأخطاء الإملائية أوالنحوية

 
من حكايات البسباسي2007
 
بقلم: أمال منير( بنت طرابلس) - حركة العصيان المدني بليبيا
 
(عنوان الحكاية: البسباسي والراتب الضماني)
 
(( شني يا ريتنا ماجينا لهال البلاد ... تي هادي ابلادنا يا دعوة .. أمتاع جداي وجداك ... ولا كان ضربك فيها اشوية القحط ,, تبي تنكرها !!! أتبيعها كيف ناس هلبة.))
 
بسباسي .. بسباسي تيوينك يا دعوة وينك ؟..... بسباسي .. بسباسي ؟
 
تيرخيرك يا زهرة غير اتصرخي وقالبة الدنيا أعياط .. تي وطي حسك يا زهرة .. تي نقصي صوتك يا دعوة ...
 
تي بره.. تي بره... جيبلنا الخضرة.. يا ودي.. والله ريقي أنشف وانا أنصرخ, ولا حياة لمن أتنادي.. وانت قاطعنا بالشر.. ولا حتى ليكال تبي أتحرمه, علينا ولا شيني ؟ وبعدين هادا شهر رمضان لكريم يا بسباسي.
 
(لمن تنادي) مشالله ماشالله لمرا قعدت ثقافة عامة يا ناس... أهوه اللفت.. وطبخي يا زهرة.. ولا اللفت مش خضرة حتى هوا.. دونك أهياه المية أمتاع النهر الصناعي العظيم. واللفت يا زهرة... وطبخي وخلي روحك كيفك كيف الناس لباس... اللي أطبخوا فى اللفت والمية... تي هادا عصر التقشف يا زهرة... أملا شني .. عصر الجماهير يا زهرة... في مواكين اكبيرة أمالا شني..
 
والنبي والنبي يا بسباسي... بلي هزوة اتراه... وبره حرك روحك وجيبلنه أشوية اللحم وأشوية بطاطا,, بيش أنديروا لقة هال الفطور بالله . لفطورا يا ودي... راهو المغرب قرب. وبعدين أيه مثقفة يا بسباسي...
 
خرفي.. ولا خرفي.. أسمعي يا مرا... توا بيش تبيني أنجيبلك اللحم.. ولا البطاطا يا أنسة... بطاطا.. تي هما وينهم الفلوس والنهار لحرف ؟ تي اثلاثة دينار قاعدات ازغرتن في جيبي... والحمد لله يا دولة يا عظمى ! وبعدين قلة لفلوس مش عيب يا مرا... اهواه.. حتى القائد مرات أيفلس ويمشي يسلف !! مش عيب.. مش عيب.
 
توا مش عيب راجل كيفك اقول وينهم لفلوس.. تي ماهو أمشيت واخلصت المرتب الضماني يا فالح. ولا الخدمة اللي أخدمتها راحت أبلاش يا بسباسي,, وبعدين تي ماهو زادوك المرتب الضماني يا بي..؟ ولا تحسابني ما أنشوفش في لذاعة أمتاعنا يا بي.. تي ماهو قالولكم أي واحد ياخذ في تسعين أجني معادش فيه.. لا تسعين بعد اليوم !!
 
قالوا.. قالوا... زدناكم... والمرتب لحرف يا زهرة دايرين راسهم أبراسه... ومعادش عندهم لا خدمة لا قدمة الا هال الراتب... وهما ايقسموا فيه وبلخبطوا فيه ويكذبوا أعليه وأيخروا فيه. تي يكذبوا يكذبوا يا زهرة... وبعدين تي هادوما ايمدوا باليمين وياخدوا بالشمال... شوفي شوفي.. النار الشايطة.. السكر والزيت والطماطم والبنزينة والضي والدوا.. وهما شنو خلوا,, او ما زدوه يا زهرة... واعلاش الناس راكبهم لقحط.. وبدوا لول لول أيفر منها.
 
هس .. هس .. تي أسكت... أسكت تيراهم يسمعوك يا ودي.. ويعطوك علي كل أجنيه أطريحه. وبعدين تي من اللي يكذبوا يا فالح ؟... أصغار ابلادنا يكذبوا اعلينا !! قصدك من يا بسباسي ؟
 
اللي يكذبوا هما اللي دايرين الشنة والرنة بالبلاد.. أواكليـــن لخضر واليابس.. ايه لخضر واليابس.. وي ونطوا أتقول إلا مش منا.. وما أتقول إلا ليبيا الا عدد ناسها إلا خمسين مليون ولا أكثر. تي قداش عددنا يا ناس .. تي لبلاد كلها.. أمخلبطينها... الدوا العلاج يا زهرة.. عدي جربي يا فالحة وعالجي . أمتاع الصيدلية معشادش يعرف توا الا.. هادا الدوا مافيش... وهادي لحبوب ما فيش.. وهادا ما فيش.. بره للصيدلية اللي بره تلقاه... ولما تسمعيهم أتقولي أهني وأنبات.. ليبيا الجنة الخضرا.. ليبيا العظمى... ليبيا النعيم الأرضي.. تبروا لافريقيا .. هكي دايرين فينا بالعاني يا زهرة,, لا أخلاص خلاص ... معادش نمرضوا.. ممنوع أعلينا لمرض يا زهرة !!! ورد بالك أديريلي أعقاب عمرنا حاجة أسماها أمرض ردي بالك تمرضي بالجماهيرية العظمى يا زهرة... نو تمرضي يا زهرة , وكلا تمرضي !!!
 
تي خيرك.. تي خيرك يا بسباسي... شكلك ناويلنا علي أنهار أحرف... تي وطي حسك .. الجار لجديد مش عارفينه وين يخدم.. وبلكي يطلعنا ما الجماعه هادكومه... والنبي يا بسباسي وطيلنا حسك وفكنا ما هال النهار لا لحرف..
 
جارنا الجديد... والله شكله إلا واحد راقد ريح.. ويخدم علي سيارته, وبعدين كان ما الجماعة هيدكومه راه ما أسكن في هال الخربة... تي راقد ريح يا زهرة.. راقد ريح.. كيفه كيفنا.. شبوب شكله عافر هال لحياة الحرفة ولم روحة وزوز ... وبعدين شكله أولد ناس مش المد يا زهرة.. ديما خير يا سي البسباسي.. انشالله اصحيح.. يا سي البسباسي.. تكيف حالك يا جاري... شبوب شكله مالنكد نين أعويناته أمسهبات والله..
 
يعني كيف أنديروا يا بسباسي... أفلس مع نهار أحرف... تي بره بره لصاحبك أمتاع المصرف تي بلكي يعطيك سلفة عال الراتب غدوة... امشيله يا بسباسي.
 
والله والله.. الا معادش عندي وجه أنشوفه... كل مرة جاية أتقول الا نشحت والله.. والراجل والله شبوب أكويس هلبة واتقول الا عارف البير واغطاه يا زهرة,,, وما فيش في فمه الا معاليش يا حاج معليش توا ربي افرجها ...انجي نسحب أتقول الا نسرق... والله.. وأمتى ما أنجي حومة المصرف يقعد الرعاش والتخبيط في افرايسي... يا ريتنا ما جينا في هال البلاد يا زهرة...
 
شني يا ريتنا ماجينا لهال البلاد... تي هادي ابلادنا يا دعوة.. أمتاع جداي وجداك... ولا كان ضربك فيها اشوية القحط,, تبي تنكرها !!! أتبيعها كيف ناس هلبة.. تي هادي أبلادك اوطنك يا تراس... تي أمالا تحسابها كسرة خبزة لبلاد... ولا الناس اللي قبلنا داروا كيف دوتك وسيبوها... أيام الطليان والايام الغبر والجوع, وهلنا عانوا هلبة راهم يا بسباسي أيام كانوا فيها لكفر والنصارى الطليان...
 
تي هادوكا الطليان يا زهرة... وهادوكا أستعمار.. والاستعمار ما ايهمه فينا يبي خيرات البلاد وبس يا زهرة.. لكن اللي توا مش طليان يا زهرة.. هادوما قالوا ليبيين كيفنه كيفهم !!! وخايفين على البلاد وهلها... لكن يا زهرة الي كايديني وداير فيا هم أكبير يا زهرة كل مرة أيجوا وايقولولنا توا انصلحوا ... توا أنديروا.. توا أنصلحولكم حالكم .. والحالة زي ما أتشوفي.. حايسة والناس راكبهم النكد والمصايب.. اللي قاهرني يا زهرة الي ماسكين لبلاد مش طليان ولا أنصارى,, تيهادوما قالولنا أنهم مسلمين وجيبتهم هال لوطا يا زهرة.. ليبيين قالوا... قالوا..
 
اخلاص معناها كيفهم كيف الطليان.. وبعدين شنو عقبوا هما أوما داروه في الناس القتل.. والحبس.. والفقر.. وقلة الحاجة.. واخر حاجة ما دروها الطليان بوكل.. يا بسباسي ! دروها هما!!!
 
شني داروا زهرة ؟ وانت شكلك تعلمتي واني مش عارف.. ريت بالله زهرة أتكلم كيف أنساوين التلفزيون !!!
 
مش قالوا زرعوا أمرض ليدز في صغار بنغازي ؟؟
 
هس.. هس.. لا مش هما يا فالحة هديكوما الطليان... قصدي البلغار يا فالحة... هما... هما...البلغار الي داروها.. وبعدين اهماه اعطوهم افلوس... مش هما.. تي مش هما.. البلغار.. أنساوين البلغار يازهرة.
 
أسمع أمشي لولد خوك وخوذ منه أفلوس لعند ينزل مرتبك لحرف.. قالوا كان بره واخدم باهي وأمليح.. وجايب أقلوس هلبة... والله الا فكر ولد خوك يا بسباسي.. بعدما ريقه شاط في التضبيح على سيارات الركوبة.. اهو سافر وجاب.. أفلوس.
 
مزال غير هادي والله... نمشي للولد أنقوله سلفني أفلوس... لا يا زهرة مانمشيله.. مزال غير هادي... تي قوتلك عال للفت يا زهرة... وأطبيخته زينة والله غير أتوكلي على الله وديرلنا لفت. واني توا أنجيب زوز أفردي خبزة وأنجي وراك أتقوليلي الزيت أكمل ولا أطماطم الحكة أمشي... راهم طلقوا النار فينا... الطليان..
 
بره... بره... جيبلنا خبزة.. سلم البسباسي... مزال في الحكة أشوية زيت وفيه أطماطم.
 
(أنتهى الموضوع)
 
امال منير - بنت طرابلس - حركة العصيان المدني بليبيا
amalmnr@yahoo.com
 

راجع من حكايات البسباسي2007 (1)
 
ملاحظة: (يتم الإعداد لتحويل حوارات البسباسي بإخراج صوتي لإذاعة صوت الأمل بحالة طلبهم منا ذلك.. مع الشكر لأخوتي بالحركة لتنسيقهم الحوار وتشجيعي لذلك. ومع الشكر الخالص لكل المراسلات من داخل بلادنا وخارجها.)

جميع المقالات والأراء التي تنشر في هذا الموقع تعبر عن رأي أصحابها فقط، ولا تعبر بالضرورة عن رأي إدارة الموقع >>>> ليبيا المستقبل منبر حر لكل من يطمح ويسعى لغد أفضل لليبيا الحبيبة

libyaalmostakbal@yahoo.com