02/09/2007

 


كل الرسائل تنشر كما هى وبدون تصحيح للأخطاء الإملائية أوالنحوية

 
راح الوطن راح
 
كان عندنا وطن يسوى كل لوطان .. برم بيه الزمان وتغير العنوان .. تمينا سهرايه وضحكه للجيران. حكام منا وماهمش منا .. توارثونا وباعونا ونحنا في عز القوايل لاحشم لا جعره.. وجرّونا من حرب لحرب وصنعولنا بدعة الحصار .. وتغير الحال وتما شعبنا جاعان بعد هاضاك العز والهنا .. شي يلهد علي تايوان وشي مابين دبي وعجمان وخلك مللي في مالطا ووطن الطليان وبرطانيا وميركان .. ذوايح ضنانا أتقول مازال حاكمنا الطليان. زمان قالها سيدي حسين لحلافي الله يرحمه وايخفف عليه التراب الثقيل:
 
العين والعه بالوطن وحكاياته
علي ماجرى من موح مانسياته
مي مرتده
ولاي مابيه تنسى بطول المده
ومازول ينسى وطن بوه وجده
الا شخص تافه كي بلاش حياته
 
الوخيذه ان هالناس ماهي حسابه حساب لبكره !!! أتقول امخلده في الدنيا وماوراهش حساب وعذاب وصدق سيدي أحمد بورميله الفاخري في قوله:
 
يا نا سين الغصره
بعد ينتفخ في الصور يوم الحشره
 
ويحضر الذنب اللي معدي عصره
تقول امس عند الليل صاير دوبه
 
ولكن هناك مع العسر يسره واهناك رب
غافر على سوق الشقاء مجلوبه
 
وما تطو لهم رحمه الله ونصره
نين الجمل يبقى يكون هلوبه
 
مع عين لبره بلفراق او صره
في كتاب ربي هكذى مكتوبه
 
من واحد عليم بعد الاجل وقصره
طلبت الشهادة ساعة الغيبوبه
 
كامله تجي لاي ناقصه لاي عسره
العبده الخايف رحمته موهوبه
 
يا ناسين اياته
عطاكم انذار خالق الكون بذاته
 
متلكم عليه وتعرفوا حالاته
نوار الربيع اللي عزيز اشبوبه
 
يبقى قش طاير وين ما لمساته
نفت ايام قبلي شديد هبوبه
 
في القرآن واضح كل شي باثباته
على السان سيدنا نبي لعروبه
 
الغايه العبد يتوب قبل اماته
ويعرف احكام الفرص والمندوبه
 
لله يرتجع يندم علي ما فاته
ويجعل افعال الخير هي مكسوبه
 
وانذكر بيوم لاخره تفيض قناته
ادموعه علي خده تجي مسكوبه
 
برحمة عظيم الفضل من سياته
ان دار هذي ما تقعد ولاشرشوبه
 
يا نا سيين التوبه
الدنيا علي ساس الغرر منصوبه اشقوا بالاخره
 
الله والعليم اني طولت عليكم؟؟!! سامحونا الله غالب الواحد وين ما يخطر عليه الوطن اتزره الغصره والحسره .. ولكن عزانا قابيتا دوام الحال من الموحال وهللي ورثها من سي أدريس أساع ايجيه من يورثها منه ..هضا حال الدنيا وين عبد الناصر والسادات وفيصل وصدام؟؟؟ الدوام للواحد القهار.
 
تبقوا علي خير وتقبنا عليكم العافيه .. وسامحونا طويسة الشاهي كانت مره وثقيله ... الله غالب السكر غالي وناقص هاليام ،، اهو تخاريف الوطن..
 
قال صاحب العقل: انمسيكم بالخير والهني.
 
حمدنه الكاديكي
 
وادي زازا - المملكة الليبية المتحده

جميع المقالات والأراء التي تنشر في هذا الموقع تعبر عن رأي أصحابها فقط، ولا تعبر بالضرورة عن رأي إدارة الموقع >>>> ليبيا المستقبل منبر حر لكل من يطمح ويسعى لغد أفضل لليبيا الحبيبة

libyaalmostakbal@yahoo.com