17/09/2007

 


كل الرسائل تنشر كما هى وبدون تصحيح للأخطاء الإملائية أوالنحوية

 
يا حسرة علي مردف زمان
فعلا يا حسرة علي مردف زمان!!!! هده الجملة ميقولهاش الا الكبير في العمر شوية.. الردافة الي علي اصولها...الردافة الي نحن بحاجة اليها ...مادام الردافة توا اصبحت سب جلالة وخنبة وقتل وكذب وتلخبيط وزقاطة وعدم احترام فاني بنقول يا حسرة علي مردف زمان وخلاص.
 
يا مردف توا ..خلي نحكيلكم علي مردف زمان!!
 
زمان كان الرديف نوارة الشارع..كان الرديف عمره ميدير حاجة مش كويسة في الشارع...رديف زمان كان يخوف من غير موس ...صح كان يشرب التاكيلا لكن عمره مضاق المخدرات .. الرديف زمان كان اوعي من مردف توا.
 
رديف زمان كان حامي الشارع من اي متطفل يجي للشارع...رديف زمان كان لما واحد براني يخطم من الشارع مرتين يوقفه و يقوله شنو فيه؟ ادور في حد يا خوي؟
 
رديف زمان كان يتحشم يقول كلمة كبيرة قدام النساء او الرجال او الشيابين.... رديف زمان كان اول واحد يوقف علي العواله في اي مناسبة في الشارع.
 
رديف زمان عمرك متسمع انه خنب او سبب مشكلة مع حد من المنطقة..رديف زمان كان شرطي منطقته.... و يا ويل اي واحد يجي يخنب او يناشب بنية من الشارع يا ويله.
 
رديف زمان كان لما تصير مناسبة في الشارع يمشي يستردف بعيــد عن الخيمة متع العرس .. وكان في حد لبز تلقاه جاي يجري باش ينهي الموضوع.
 
رديف زمان كان يخوف من غير موس ولا سيف... رديف زمان كانت شخصيته قوية... رديف زمان كانو يستنجدو بيه في الشارع.
 
رديف زمان كان يهبل امتا يقولوله ان ولد شارعكم فلان (الضعيف او الي معنده حد) راهو ضربوه فتلقاه يركب سيارته ويخطم علي جماعته وطول يمشو للمنطقة الي يسكن فيها الشخص الي ضرب فلان.
 
رديف زمان كان والله يتحشم من الكبار وعمره ميدير عيبه قدامهم ولا يسمح لاحد بفعل اي عيبة. وكان عمره ماقام عينه علي اي بنت من المنطقة او عاكسها.
 
رديف زمان كان هو وجماعته لما بيهيجو ايهيجو بهدوء وبدون مشاكل .. وكان حد منهم لبز يقوله معاش تجيني ولا تخطم من هني وكان نلقاك في المنطقة يا ويلك.
 
زمان وحني صغيريين لما نخطمو مرات الرديف متع الشارع يوقفلك نصف الطريق ويشدك ويحدفك فوق ويتلقاك ويقولك كيف حال بوك وصف شني تقراء توا وترا سمع عليا سورة الفاتحة وبعدين يعطيك خمسة قروش ويقولك بره اشري حلوة.. وانتا تكون فخور انه يعرفك وتحس ان عندك ظهر يحميك.
 
رديف زمانعمره منقز علي حياش الناس ولا كلوط ولا سمح باي مشكلة تصير في منطقته.. رديف زمان كان فعلا رجل بمعني الكلمة ونادرا مكان يستعمل موس او كمية.
 
رديف زمان يا اخواني .. قدام المردف متع توا يعتبر راجل ويعتبر سيد التريس ويعتبر شرطي المنطقة وحاميها. مش توا الواحد يمصمص فمه بلتاكيلا ويقلب الشارع متعه فوق راسه ومافي حد سالم منه.
 
صح هو كان رديف بس علي الاقل خير من واحد من رديف توا ومتع مشاكل وخنبة وقلابة... صح هو رديف... بس خير من واحد ساكت وجبان... صح هو رديف... بس احسن من واحد منافق وقالبها فوق راسه... صح هو رديف... بس والله سيد التريس.
 
للمعلومة راهو أني مش مؤيد الردافة لكن هدا كلام الي كان زمان! ويا حسرة علي مردف زمان.
 
هيثم

جميع المقالات والأراء التي تنشر في هذا الموقع تعبر عن رأي أصحابها فقط، ولا تعبر بالضرورة عن رأي إدارة الموقع >>>> ليبيا المستقبل منبر حر لكل من يطمح ويسعى لغد أفضل لليبيا الحبيبة

libyaalmostakbal@yahoo.com