05/09/2007

 


كل الرسائل تنشر كما هى وبدون تصحيح للأخطاء الإملائية أوالنحوية

 
مافيش خبزة ؟؟ والدقيق ناقص؟!!!
السلام عليكم
 
وااااا اسفاة عليك يا بلاد العز يا مصراتة!!!! هدا يا سيدي قبل كم يوم روحة لبلادي بعد غيبة طويلة, ما استاحشنا البلاد و الاصحاب والاهل, المهم, من اول ما نزلت من الطيارة, صديقي الي جاي روح بيا قال اسمع راهو البلاد فيها ازمة خبزة, قتلة خبزة ؟؟؟ ...
 
قال اية اية ... ما هو الدقيق ناقص .. والكوشة تخدم قنطارين كل يوم والباقي يبيعوة ... سبحان اللة.
 
باهي شنهو المشكلة ؟
 
قال ماهو خوتنا اليبيين يشرو في الخبزة بالميات, ويوكلوها للسعي. والدولة معاش عندها فلوس باش تلبي احتياجات الشعب الليبي, 5 مليون راهم هلبة....!!!!!!!!!!!
 
قتلة هدى عارفينها من زمان, ما هو ما فيش علفة لا شعير, الناس شن بدير!!
 
قال اية عارف, ما هو ناس دون ناس ....!!
 
كيف ؟
 
ماهو هدا خصيصا لعرب مصراتة, ماهو عندهم سعي هلبة, وخبزة واجدة. و الشعب الليبي (عالي قولت ولد الكلب) شعب مسرف ومبدر.. لدلك ما يحقلكش اكثر من 10 خبزات. لا ولازم اتنوض بكري باش تشد الطابور عالكوشة, كانهادا واللة تبات جيعان.
 
قلت باه والي عندة عائلة 10 والا 15 نفر, كيف يدير ؟
 
قال ايبيع السعي الي عندة ويشري دقيق خيرلة. !!!
 
اللة يورينا فيك يوم يا بدوي ....!!!
 
ليبي مقهور

جميع المقالات والأراء التي تنشر في هذا الموقع تعبر عن رأي أصحابها فقط، ولا تعبر بالضرورة عن رأي إدارة الموقع >>>> ليبيا المستقبل منبر حر لكل من يطمح ويسعى لغد أفضل لليبيا الحبيبة

libyaalmostakbal@yahoo.com