06/06/2008

 


 
يوميات صالح وطالح (2)
صالح: اهلا بيكم فى المنابر!
 
طالح : اهلا ياخوى صالح! ماعرفتنيش!
 
صالح: وهل يخفئ القمر! اهلا بيك يا امير طالح!
 
طالح : لا امير ولا دياولو!
 
صالح: شينو غيرت اسمك رامبو !
 
طالح: رامبو شينو ! هدوك ايام الغفلة!
 
صالح: ايام الغفلة!!
 
طالح: خيرنا ياصالح وانت كل كلمة شادهالى! مشيها ياخوى!
 
صالح: اسمع يا رامبو ! اقصد ياطالح! ايام البطولات والكلاشنات والضحك على الدكون راهو معاش يمشى معانا!
 
طالح: ياخوى صالح غير عطينى معاك كلمة بس!
 
صالح: راك انت فى منبر حر ! مش كلمة نعطيك بس حتى 100 لكن ننصحك بلا نفخ صدور!
 
طالح: ماسمعتيش ياصالح! امس درنا اجتماع انا وخوتى الطولاح وقالولى رانا كنا غالطين فى حق الشعب ! والشعب راهو استاقظ بينا ولازم نعد العدة !
 
صالح: العدة!!!!! انشاء اللة مش كلاشين!!
 
طالح: لالالالا ! ماتفهمنيش غلط ياصالح! كلاشين شينو! حتى الكلاشين  طلع صيني!
 
صالح: امممممم!
 
طالح: نقصد بالعدة! الكلمة الطيبة والتسامح! وبينى وبينك جاى اليوم نبيك تكون واسطة خير مع الشعب! وراهو خايف يثور علينا!
 
صالح: باهى شينو الكلام اللي سمعته انك بتكشف وتفضح ملفات مخجلة عليه!
 
طالح: لالالا ! ياصالح راهو كلام وبس! رانا معولاين عليك وعلى اللة! وتكون واسطة خير مع الشعب ! ياخوى راهم 6 مليون!
 
صالح: امممم توه عرفتهم 6 مليون!
 
طالح: ماسمعتكش شينو اتقول!
 
صالح: لالالا! مافيش شي! كنت انفكر بصوت عالى بس! معليش ياخوى طالح وقت المنبر تم وان شاء الله انشوفك فى اليوم الثالت وانكمل كلامنا!
 
والى اللقاء فى يوميات اخرئ......
 
تحياتى... الخمسي

 

يوميات صالح وطالح (1)

جميع المقالات والأراء التي تنشر في هذا الموقع تعبر عن رأي أصحابها فقط، ولا تعبر بالضرورة عن رأي إدارة الموقع >>>> ليبيا المستقبل منبر حر لكل من يطمح ويسعى لغد أفضل لليبيا الحبيبة

libyaalmostakbal@yahoo.com