08/10/2006


 

قيم الصلاه والنفس لاتتعسا .. ماينضمن حقا اردود نفسا
صلاه بكملها .. وابعد ابليس وربنا يقبلها
وهذي قصيده يافتى مقلها .. فيها مواعظ ع الحياه وادرسا
قصيده امنقى م العيوب عللها .. قصيده الدنيا ولاخره قابصها
صلاة النبي في ختامها واولها .. ونقرا عليك القول نا مندسا
صلاه برواقه .. ورزق اللبنادم علي خلاقه
وان بعت وشريت ايكون فيه صداقه .. وارضى بقليلك سلعتك رخصا
ميط م الخلايق بيعهم بلقاقه .. وينزل ثمنها وين ما تواكسا
وفيها خلايق ف الربا منداقه .. وربك عليهم رحمتا ميسا
وفيهم واجد عاليات اخلاقه .. برزق الحلال القيمتا غمسا
صلاه تتقا .. بيها جحيم اللي العزم ايرقا
واللي ترك فرض الكريم وحقه .. يوم اللقاء لازم النار اتمسا
يوم اللقاء عطبك عليهم نقه .. ربك شواهم م العذاب وقسا
الدين اشقابه .. واعمل احسابك راه عليك رقابه
احذاك ملكين وكلهم كتابه .. اللي ع اليمين الطيبات اتخصا
ان كان احسنات ايحطن في كتابه .. الوحده بعشره والكتب قرطسا
واللي علي شمالك هابتين وهابه .. عيط عليها انفيستك فلسا
كل السوايا حطهن في كتابه .. وياويل هللي ف المعاصي لسا
نهار الخلايق كلها اتكابا .. وهول الحساب عيونها شخصا
صلاه يا خواني  .. الدنيا قديمه ما لهاش اماني
هي فانيه واللي عليها فاني .. كي غرسا بو طرح كيف نوسا
ساعه ربيع وزاهيه بلواني .. وساعه اجداب وخضرته يبسا
وساعه عجاج امسويه ريغاني .. وساعه ابحريه وريح يامكوسا
وساعه صقيع وبرد ياحباني .. وساعه لوايا والوطا قربصا
قدرة الله اللي خلق لنساني .. وخالق الدنيا من عدم واساسا
والخلق قالت ف الامثال معاني .. عريان هللي بالايام تكسا
قيم اصوله .. فرض العباده كي رضاه اتنوله
تلقى المشاكل كلها محلوله .. وعرت عليك احلولها ميسا
اللي سمراتك كام ليل بطوله .. وعلمك اضايق ع الحلول تعصا
لكن بعد يرضى عليك المولى .. جميع المشاكل كلها يكنسا
وراها الدنيا هي الدار الاولى .. دار امتحان لناسها خصصا
لاتبسطك وقتا اتجي امعدوله .. وتكسب اموال ادير منها رصا
لاتزعل عليها كي اتجي بميوله .. وحالك ايرق ومال فيه الخصا
خطرها الدنيا للفنا مجعوله .. واشقى بدينك ولاخره قدسا
قيم الصلاه والنفس لاتتعسا.. ماينضمن حقا اردود نفسا

 

مع تحياتي الباحث احمد الحوتي

 

المصدر

مقابلة مع الشاعر

 


 

جميع المقالات والأراء التي تنشر في هذا الموقع تعبر عن رأي أصحابها فقط، ولا تعبر بالضرورة عن رأي إدارة الموقع >>>> ليبيا المستقبل منبر حر لكل من يطمح ويسعى لغد أفضل لليبيا الحبيبة

 

libyaalmostakbal@yahoo.com