09/09/2006

 
(هناك ميط م لصحاب) للشاعر الكبير بوعجيلة عبد السلام القبايلي
 
هناك ميط م لصحاب خير بلاهم ** حافظ على مبداك من مبداهم
هناك صاحب طربه ** وهناك صاحب تاجده في الكربه
وهناك ميط م الصاحب كيف الحربه ** تشقى وما تعرف اميوح هواهم
وهناك من تخش النار وتخاطربه ** وهناك من يغيرهم كلام انساهم
وهناك ناس ايفيدوا ** وهناك ناس من هم الزمان ايزيدوا
وهناك ناس مايلقوا انكان ايصيدوا ** أرياح في الفضاء تبرم إلا بهواهم
وهناك ميط م لصحاب كي مايريدوا ** معاك ع العدا والله عليك امعاهم
وهناك ناس اتجيهم ** وترايف بعد غيبة نهار عليهم
وهناك ناس تكرهم بعد ترعيهم ** على شي داخل تعرفه جواهم
وهناك ميط م لصحاب لك نوريهم ** كيف ما زمانى لى نا وراهم
كي الطبل تسمع من بعيد زفيهم ** وفي داخله خاوى مثيل خواهم
هناك ناس ايهموا ** اتشوف الخطا منهم وما ينذموا
فريضة أفعال إللى عليك اسموا ** للناس تلحقك حتى إن بان اخياهم
وأصحابك ان كان ابداك مايهتموا ** اسماهم اللي نسيوك وانت انساهم
هناك صاحبٍ خيره ** سوا في الرفق والله اتحوزه جيره
وهناك من تبدل صحبته وديره ** رفيق في العمل والله مواطن فاهم
وهناك من اتمسيه ابنظاف ضميره ** حتى لو على دربك القيته واهم
هناك ناس تودك ** وهناك ناس ترعا ع الخطا وتردك
وهناك ناس لك وما يجو في يدك ** ولا تعبا ساعات الكدر بعباهم
وهناك ناس ذكراهم احذاك يسدك ** سوا يقربوا والله بعيد جباهم
الناس مبادى ** والعلم شتى والهدى م الهادى
يارب حقق غايتي ومرادى ** بالعفو عن لصحاب وان خطاهم
واجعل طريق الخير هى ميرادى **واللي طلبوا فضلك مايخيب رجاهم
 

مع تحياتي/ احمد الحوتي

ahmed_alhuoty@yahoo.com

المصدر
منتديات الونيس

 


 

جميع المقالات والأراء التي تنشر في هذا الموقع تعبر عن رأي أصحابها فقط، ولا تعبر بالضرورة عن رأي إدارة الموقع >>>> ليبيا المستقبل منبر حر لكل من يطمح ويسعى لغد أفضل لليبيا الحبيبة

 

libyaalmostakbal@yahoo.com