11/09/2006


الوطن وحكاياته
 
احمد الحوتي


 
نظمها شاعرنا الكبير المرحوم حسين لحلافي عام 1935م وهو في المهجر
ويصوّر فيها مدى اشتياقه وحنينه للوطن رحم الله شاعرنا لحلافي واسكنه فسيح جناته
 
العين والعه بالوطن وحكاياته علي ماجرى من موح مانسياته
مي مرتده ولاي مابيه تنسى بطول المده
ومازول ينسى وطن بوه وجده الا شخص تافه كي بلاش حياته
والعه منهاسه مرايفه ع الوطن العزيز وناسه
ومي ناسيه حتى بطولة ياسه ولاتبدله بالنيل لو طالاته
كايده ف الحمله مرايفه ع الشبرم وقيس الرمله
وغيطان دفنه والسقايف جمله وطبرق وحومة عكرمة ومزاته
مي صباّرة مرايفه علي درنة ووادي ماره
وبوشمال والقبه وقيس بشاره والقيقب وغاشي كان في مجباته
تذرف ديمه مرايفه رياف يهّم فات القيمه
علي ترت والصفصاف ومواهيمه وشحات والعالم اللي حازاته
دمعها شلالي وما نلومها ديمه الموكر غالي
مرايفه علي لبرق ووادي لالي وقيس قلشيه وسباق وجناناته
مرايفه على الفايديه وبلقس وع الباطن اللي قبليه
ولافوق ع الشارب علي عاليه ووادي القصور وماحوّن جالاته
والعه منظامه خاطر عليها وطنها وايامه
وقيس المخيلي والشرف ووهامه ياهل ترى هالساع كي حالاته
عامر بناسه ياترى وانعامه والله اخلي منهم ومن خلفاته
بعد غوش ديمه منطرح قدامه لاهج خايف لا الدار جفاته
ياطول ماحاشن عليه غلامه وين م الصادي زام في نزلاته
مرايفه ع العلبه (1) وزاوية صدارة مشرفه ف الهلبه
تمابي على قوه تجي منصلبه لاتهاب طلياني ولا قواته
جيش م العرب واجد انجي صايلبه ونقليز بطيوره ودباباته
حتى وهو عدونا(2) ع العدو ندخلبه اللي يموت منهم نفرحوا لماته
مرايفه ع البيضاء تاخذ الليل تنين كي المريضه
ومانلومها حب البلاد فريضه واجب علي لنسان كيف صلاته
والعه ولهانه مرايفه ع المرج وعلي سكانه
علي توكره واظهر علي دريانه ولبيار والرجمه وماحقاته
مرايفه علي بنغازي تاخذ الليل وهي مغير تزازي
رياف كل يوم يزيد مو متوازي لاعنها دبار لاتعباته
والعه منحرقه العين ع الجبل كله وجملة برقه
مرايفه ع اللي من زواره شرقه علي طرابلس واظهر علي مصراته
كله وطنا يمكن تقابل زرقه وناخذوه م الدوله اللي ملكاته
العيب النسيه كي تطول الفرقه ماعمرها غربه فتى واطاته
الحي يتعلا كيف يبقى يرقى وان كان عاش لابدا ايطول مناته
 

 

وفعلا تحققت نبؤة الشاعر ففي الحرب العالمية الثانية انتصر الانجليز على الطليان
 بمعاونة (2)الجيش الليبي الذي تكون بمصر وقتذاك
 

 

مع تحياتي الباحث احمد الحوتي
ahmed_alhuoty@yahoo.com
 

 (1) يقصد زاوية العزيات
 

 

 

جميع المقالات والأراء التي تنشر في هذا الموقع تعبر عن رأي أصحابها فقط، ولا تعبر بالضرورة عن رأي إدارة الموقع >>>> ليبيا المستقبل منبر حر لكل من يطمح ويسعى لغد أفضل لليبيا الحبيبة

 

libyaalmostakbal@yahoo.com