06/08/2006

 
ديرعزم وانساها اللي نسياتك
 

اخوتي زوار الموقع الكرام بدا هذة الابيات الشاعر الكبير المرحوم عقوب الشرمي وقد قالها منذ اثنى عشر عاما بعد سماعه لشريط لاحد الشعراء يشكوا فية ترك حبيبته له وتاثر الشاعر عقوب لمصاب هذا الشاعر ونظم هذة الابيات وقال:

 

دير عزم وانساها اللي نسياتـك .. لو كان فيها خيـر مـا فاتاتـك
لاتـــطـــريـــهـــا .. ولاخير ف اللي ناسيه غاليهـا
مظلوم انت وايجيبوا اللوم عليها .. اللي عاشرت غيرك بعد غياتـك
لـو كــان بـنـت اصيـلـه.. ماكان باتت عند غيـرك ليلـه
اليوم جايبه واشون وام عويلـه .. قدام العرب برخص ثمن باعاتـك
ولا تــــــجّــــــدا .. وانسى غلا ماضي وفات وعـدا
قداك تتركا م البـال هالمسّـدا .. ودي انقولها حتى ان ماعجباتك
ولا تــشـــقـــابـــه .. اليوم الغلا تما امغيـر انصابـه
ادوّر او ما تلقا اهنـاك اربابـه .. زمان الوفا بالعهد راح وفاتـك
لازمـــــان الـغــيــه .. هاضا زمان النقـص والنقديـه
ماعد يشقابـك كحيـل اصبيـه .. ان ما كان عندك محفظة غلاتك
مايـمـنـعـك تـفـكـيـرك .. واسمع وصاتي خير من تدبيرك
انساها اللي شقيّت اليوم بغيرك .. مهناك كيف الصبر فيه نجاتـك
ارقـــــد مـتـهـنــي .. راهن بنات اليـوم مـا والنـي
ياما اشقيت بيهن وهن خاننـي .. نازاد ياما ريـت كـي حالاتـك
ياصـاحـبـي هــاودنــي .. وانتوبوا على الغيات و اتعاهدني
ونا قبل ماتوقع تعـال انشدنـي .. بنات يلعبّن وانتا علـي نياتـك


وبعد سماعي لهذة الابيات الرائعة جادت قريحتي بهذة الابيات علها تنال رضاكم واستحسانكم قلت:
 

دير عزيمه .. وانسى غلاها سمحة التبسيمه
تمت معا غيرك اليوم امقيمه .. راجيتا واجد وهي ماجاتك
لاتنشغل من شوره .. ولاعاد تشقابا جميل الصوره
وعده الا ميت سكن لقبوره .. هاضا عزايا في حدود امناتك
لاعليه ادوّر .. وانسى غلا مولى الجبين امنور
واصبر علي جرحك اللي متجوّر .. لاخير ف اللي بالخطا كفاتك
سيبها من بالك .. وانساها اللي دارت وليف ابدالك
اتنّوح احذاها ما شغلها حالك .. كان حقها سابت هاضاك وجاتك
اترك مدعاها .. اللي والفت غيرك اليوم انساها
اشقا بغيرها ياما خلق مولاه .. ما م الشباب اللي حدود امناتك
اليوم غنيه .. واليوم حالت دونها قسميه
ومي سامره كيفك اتبات هنيه .. ما اتقول حتى عمرها راعاتك
نا وحلت في تفسيرها القضيه .. اللي واخذه عقلك اللي اشغلا تك
كان حقها وفت احدود الغيه .. واتسيب الضنا والبيت لجل ارضاتك
وتعيشوا عقاب العمر فنطازيه .. ان كان طلتا منهم وهي طالاتك
اللي اليوم حالو دونها حسديه .. عدن سنين اطوال ما راعاتك
نا انعيب فيها غير مي ع النيه .. حال غايتي تنسى اللي لاعاتك
عارفينك مظلوم ميه لميه .. لاكن انردوا فيك عن راياتك
خايفين من حاجات حرمانيه .. ما تلومشي ع الناس كان نهاتك
اتدير ايش للي عندها ذريه .. تاخذ غضب غيرك ولا راضاتك
نا انعيب فيها غير هي مظلومه .. عطبك عليها يوم كان طراتك
حال دونها نقار حط احقوقه .. معاه عقد رسمي موش كي حا لاتك
امعا خالتك راقد هني في نومه .. مو مخوفه منك وطول عصاتك


مع تحياتي احمد الحوتي
 

ahmed_alhuoty@yahoo.com


أرشيف الكاتب


 

جميع المقالات والأراء التي تنشر في هذا الموقع تعبر عن رأي أصحابها فقط، ولا تعبر بالضرورة عن رأي إدارة الموقع >>>> ليبيا المستقبل منبر حر لكل من يطمح ويسعى لغد أفضل لليبيا الحبيبة

 

libyaalmostakbal@yahoo.com